ANTOLOGI GEGURITAN

Negaraku ...

Kuciwa!

Wis ra wruh tata

Wis ra eling ukara

Wis ra duwe panutan

Negaraku …

Ngono iku lak wis pinilih

Sapa raja .. sapa patih .. sapa rewang

Pangarepan becik dening wong akeh

Negaraku …

Wis ra etung isin

Para pujangga sing pegaweyane ureg-ureg dluwang

Lan bisane manthuk-manthuk

Negaraku …

Sejatine kanggo apa..?

Kanggo apa ngandel mring wong

Sing bisane gawe beka

Negaraku ..

Pak Sopir

Wis krasa gumeter

Anggonmu ngukel setir

Wis krasa lara lan cumpleng

Balung sing mbendina mecaki gas

Lan rem

Mung kanggo sega sapulukan

Mung kanggo anak lan bojomu

Anakmu sing kerep mbalela

Gawe mangkelmu

Koklilani ngurbanake nyawa

Ora liya

Meneh-meneh mung kanggo kluwargamu

Pak …

Muga-muga tansah diparingi kaslametan

Sing ati-ati nguruti dalan

Kang dawa ora ana pol-polan

Kacang Atom

Manggon ngruntel ing jero wadhah

Sing sumpeg kok ya krasan

Ora ana awa, klagepan

Wujudmu kuwi kerep gawe gumregut

Kepengin nyokot, nglethak!

Sing diluru ya siji

Jerowanmu werna coklat kuwi

Jerowan sing dadi lakon utama

Jerowan sing bisa diklambeni

Pirang-pirang werna

Putih, ijo, lan abang

Mak thesss!! Kriuk kriuk!

Ana sing anyep, ana sing asin

Ana sing pedhes

Titip Kangen

Tengahing sasi

Wulan anyaran taun iki

Alon-alon olehku mlaku

Ninggalake panggonan ngasone kreta

Jangkahku kaya macan luwe

Lemes…

Tengahing tahun

Wulan lawas taun iki

Isih cetha wewayanganmu

Saklebat

Tanganmu ngawe-awe, pamit

Isih rada lemes…

Aku kangen

Kidhung Katresnan

Nalika tresna iku  kok tulisake

Kembang-kembang padha mekar

Tawon-tawon padha ngisep sekar

Swara mbrengengenge nambah ruwete atiku

Ruwet nandhang wuyung

Nalika tresna iku kok ucapake

Wit-wit padha mentelung katut angin

Godhong waru rontok saka pang-pange

Nambahi gumregute atiku

Gumregut eling pasuryanmu

Nalika tresna iku kok swarakake

Krasa angin mandheg sedela

Kepengin melu krungu kidhung katresnanmu

Katresnan suci …

Katresnan sejati …

Apa Kowe Ngerti?           

Langit mendhung, peteng ndhedhet ..

Angin banter … Adem !!

Nembus balung

Kaya tresnamu sing nembus atiku

Lara branta ra tak rasa

Nanging, apa kowe ngerti?

Niba tangi nambani lara iki

Lara nandhang wuyung

Mangan ngombe krasa getir, pait

Ora kepenak

Cah, cah

Apa kowe ngerti?

Ombak Asmara

Ombak segara alon-alon

Nggapyuk pasir pesisir

Angin sore tumiyub ngoyak rambut

Raga waton gumeter

Nggejejer ndelengi ambane samudra

Ombak saya suwe nyenthok sikil

Adem, seger

Kayadene kowe

Tresnamu

Sing saya nyenthok ati

Ning saiki ana ngendi

Ndang balia

Ndang renea

Kaya ombak ninggal segara

Bali maneh menyang segara

Kasepen

Yen dhong lungguhan

Ayang-ayang sing ngancani

Yen dhong ngglethak

Swara cek cek cek sing nyanyi

Yen wayah mlaku

Mung awa angin sing nyandhingi

Sepi

Wakil Rakyat, Aku Kuciwa

Wis ta

Ra usah ngumbar janji

Aku ora butuh

Wis ta

Ra usah ngumbar asih

Aku wis ra perdhuli

Wis ta

Ra usah pamer jas lan sepatu klimismu iku

Aku wis ra gumun

Jan-jane aji apa rakyatmu iki?

Aji apa aspirasi wong cilik iki?

Bisamu mung udut jedhat-jedhit

Ra perdhuli,

Sing penting rak aku sugih

Sing penting rak aku makmur

Tanpa mikir

Sadhara lek, sadhara pak, sadhara bu

Kowe ra nduwe aji yen rakyatmu keplaran

Kowe dudu sapa-sapa

Mung Kanggo Biyung

Jaman saya sepuh

Wayah uga lumaku ora etung mandheg

Utawa ngaso sedhela

Rina mlebu wengi, lan

Wengi sing peteng

Bali marang esuk sing blereng

Ora leren-leren

Kaya katresnanmu, biyung

Tresna sing ora tau mandheg

Utawa ngaso

Katresnan sing nentremake

Dalan sing dak jangkah iki

Mung kagem panjenengan, Biyung

Sembah bekti kang putra

Gonjang-ganjing

Bumi sansaya panas

Umub, mbledhos!!!

Dhar dhar dhar!!!

Apa maneh iki nang?

Bocah sekolah padha tawur

Sing tuwa ladalah saya ngawur

Mbakar bis, mbakar kantor, mbakar omah

Nggo apa jal, nggo apa nang?

Senggol, bacok!

Neka-neka, royok!

Wis ra ana jenengane katentreman

Ngendi bocah-bocah cilik

Sing biyen senengane dolanan bebarengan?

Ntek wis

Udan Jogja-Magelang

Malioboro krasa atis

Udan tanpa sela

Wiwit cebloke srengenge ing sisih kulon

Dalanan padha teles

Awak gebes, adhem

Langit kaya lagi nangis

Eluhe tanpa sela

Ing sadalan-dalan nyang Magelang

Tetep adhem, saya adhem

Saya kaku tan dirasa

Prambanan

Mlebu bledheng,

Dipapag sekar werna abang

Tinandur ana plataran, amba

Sangarepe candhi-candhi kang misuwur

Wisnu, Brahma, lan Siwa

Endah ning mripat,

Ayem ning ati

Subur makmur ing sakiwatengene

Awa adhem ayem krasa nggondheli

Aja lunga!!!

Krasa digondheli

Wis kebacut

Kepencut marang kowe

Gawe antengku nganti wayah iki

Malioboro Wayah Wengi

Sepertelone wengi

Isih pating mbrengok

Bakul-bakul ana pinggiran

Kaos kang, jajan kang

Isih rame

Saya wengi saya rame

Lanang wadon, nom tuwa

Padha lelungguhan, njagong

Padha lumaku, montor-montoran

Ubeng-ubengan

Ngancani lakune wengi sansaya ndadi

Juwana Kuthaku

Juwana

Kutha cilik ning misuwur

Najan mung cilik

Akeh aweh devisa marang Bupati

Bandeng prestone

Batik Bakarane

Trasine

Wis, apa maneh?

Rak akeh ta?

Eh iya, uyahe

Jan sugih tenan

Juwana

Kutha cilik merak ati

Johor dudu Johar

Kana iku Johor dudu Johar

Umpama Johar ya wis tak parani

Umpama maneh

Johor bisa dipindah nyang Johar, ngimpi

Johor kuwi rak Malaysia

Lha Johar kuwi mung cedhak kono kae

Pikiran mung bisa ngayal

Mindhah Johor nyang Johar

Merga wis banget kelaran

Nunggu wayahe piyik bali nyang susuhe

Ning kapan?

Aku Cah Sekolah

Aku cah sekolah, cilika mesthi gagah

Ora tau wegah, senajan krasa sayah

Saben dina mlebu, senajan ora sangu

Nyuwun sangu pangestu Bapak Ibu

Walah…

Iku rak lagu jaman cilikanku

Jamane isih lugu

Dudu jaman saiki

Akeh cah sekolah,

Sing padha wegah sekolah

Akeh cah sekolah,

Sing wegah mangkat sekolah,

Yen ra ana sangu

Akeh cah sekolah

Sing kerep mbantah welinge wong tuwa

Jarene cah sekolah

Kok ya malah nggladrah

Tikus Werog

Ana tikus werog, gedhe

Mlayu rana mlayu rene

Luru panganan

Ora mung sisa

Kadhang ya mangani anakan pitik

Anakan bebek

Ungkrah-ungkrah, mlebu leng

Mlebu got

Gaweyanmu kus, tikus

Dhasare tikus ya tikus

Wis lah, pangana kabeh

Pati Bumi Mina Tani

Wewatesan Laut Jawa

Sisih etane Kota Kreteg

Sisih kulone Rembang Bangkit

Sisih lore Kota Sate

Pati Bumi Mina Tani

Berdaya, Upaya, Menuju Identitas Pati           

Makmur, Ideal, Normatif, Adil, Tertib, Aman, Nyaman, Indah

sawah, tambak, lan kali

sumber panguripan ing tlatah asri iki

Godhong Waru Biru

Dudu sabrang dudu tales

Dudu godhong gedhang

Apa maneh godhong pelem

Saka sakabehing wit-witan ijo

Saka sakabehing godhong-godhong

Kang ngawe-awe

Kok ya mung godhong siji kuwi

Sing tak delok, sing tak pethik

Godhong waru,biru

Kanggo kowe

Ya, mung kanggo kowe

Simpenana ing panggonan sing primpen

Aja nganti ana uler utawa kroto

Sing nggremeti

Reksaa sing ati-ati

Merga godhong iku anane mung siji